ILOILO CITY- Nagahulat pa ang regional chair sang Partido Federal ng Pilipinas nga si Iloilo Governor Arthur Defensor Jr. kun san-o gid ang pinal nga petsa sang pagsumpa sang bag-o nga mga myembro sang partido.
Sa interview sang Bombo Radyo kay Iloilo Governor Arthur Defensor Jr., iya ginpahayag nga apisar wala pa sang petsa, apang napat-ud sini nga ang oathtaking sa Western Visayas ang mangin pinakauna nga pagsumpa sang mga bag-o nga party members sa bilog nga Visayas.
Suno sa gobernador, positibo man siya nga sa Iloilo ini patigayunon.
Matandaan nga Abril 10 kuntani ini una gintalana apang wala nadayon bangud indi available ang mga matag-as nga opisyal sang partido.
Sang nagligad lamang nga adlaw sang nagpirma man sang pagpakig-alyansa ang Partido Federal ng Pilipinas sa Lakas- Christian Muslim Democrats.
