ILOILO – Gin-athag ni Iloilo Governor Arthur Defensor Jr. nga may yara sang mga early warning devices sa mga dalanon sa probinsya sang Iloilo apang indi pa ang mga ini ‘standardized‘.
Ini ang kasunod sang panawagan ilabi na sa 2nd, 3rd, kag 4th districts sang probinsya sa diin naobserbahan nga may kakulang sang nasambit nga mga paandam.
Sa interview sang Bombo Radyo kay Defensor, iya ginpahayag nga aminado siya nga sa iya personal nga paglibot sa probinsya, may yara sang mga ‘under construction roads’ nga nagakinahanglan sang dugang nga panagang ukon proteksyon agud malikaw sa mga insidente ang mga motorista.
Kun may ara man suno kay Defensor, masami nga madali ini hawigon sang naga-agi ilabi na sa tion sang kagab-ihon.
Magluwas diri, ginpahayag sang gobernador nga may ara man sang mga salakyan nga nagaplastar sa higad sang nasambit nga mga dalan apisar wala pa ini natapos sang obra.
Kaangot diri, natalana nga makigsapol si Defensor kay Department of Public Works and Highways (DPWH) Western Visayas Regional Director Lea Delfinado kag sa mga district engineers agud madiskusyunan ang problema.
Nahibaluan nga sa privilege speech ni Vice Governor Christine “Tingting” Garin, iya man ginpatpat ang tuhoy sa Road Safety and Traffic Management sa probinsya sang Iloilo, sa diin iya ginpanawagan sa DPWH nga i-monitor ang mga dalanon nga ginakaayo bangud wala sang mga early warning devices.
Samtang, santu sa data sang Iloilo Police Provincial Office (IPPO), narekord ang 485 cases humalin sang Enero 2019 tubtob subong nga bulan may kaangtanan sa mga aksidente sa dalanon bangud sa kakulang sang nasambit nga paandam.
