Espesyal nga mensahe ang nabaton sang mga Filipino residents sa Tokyo, Japan nagikan sa ila mismo nga gobernador.
Sa 40 ka segundos nga mensahe ni Governor Yuriko Koike, iya ginpahanumdom sa mga Pinoy sa amo nga lugar ang pagsunod sa tanan nga minimum health protocols batok sa COVID-19 subong nga holiday season.
Gingamit sang opisyal ang lenggwahe nga Tagalog samtang ginadeliver ang iya nga speech.
Gintapos ni Koike ang iya nga malip-ot nga mensahe paagi sa pagpahayag sang slogan nga: “Iwasang mahawa at huwag manghawa.”
Yari pamatian ang mensahe ni Tokyo Governor Yuriko Koike:
Madamo ang nagdayaw sa amo nga mensahe sang gobernador bangud Tagalog ang gingamit.
Apang suno naman kay Bombo International Correspondent Josel Palma direkta sa Japan, may mga Pinoy gid gihapon nga salawayon sa ila nga lugar.
Ginalauman nga mas mahangpan na nila ang mga protocol bangud mismo na nga lenggwahe sang Pilipinas ang gingamit ni Koike.
Ginabantayan man subong ang posible pagdeklarar sang state of emergency sa Japan kun indi pa gid matapna ang pagtaas sang COVID-19 cases sa sulod sang tatlo ka semana.
Suno sa otoridad, kritikal ang masunod nga tatlo ka semana kag yara na sa maximum alert ang bug-os nga pungsod bangud sang daily infections nga nagaka-rekord.
