Ginpasakaan sang Crimes and Corruption Watch International sang kaso nga paglapas sa New Government Procurement Act kag Anti-Graft and Corrupt Practices Act ang Department of Public Works and Highways (DPWH) Region 6 officials kag mga executives sang International Builders Corporation.
Gin-file ang kaso sa Office of the Ombudsman sa Quezon City.
Ginpangalanan sa amo nga complaint sanday DPWH-6 Director Sonny Boy Oropel, mga district engineers sang DPWH-6, mga myembro sang Bids and Awards Committee, kag si Helen Edith Lee Tan nga presidente International Builders Corp. (IBC).
May kaangtanan ini sa ginapahayag nga iregularidad sa bidding contracts kun sa diin ginaakusaran ang DPWH-6 officials nga nagpabor sa IBC sa disbursement sang infrastructure projects sang 2024.
Sa P9.25-B nga balor sang gin-award nga mga kontrata sang amo nga tuig, kapin P2.4-B gid ang ginpahayag nga nagkadto sa IBC.
