ILOILO – Gin-aprubahan sang Kamara sa third and final reading ang duha ka hagna nga nagadeklarar sa Gigantes Islands kag Tambaliza Island sa quinto distrito sa probinsya sang Iloilo bilang ecotourism zones.
Ang Islas de Gigantes ang yara sa banwa sang Carles samtang ang Tambaliza Island ang yara sa banwa sang Concepcion.
Sa interview sang Bombo Radyo kay Iloilo Fifth District Representative Raul ‘Boboy’ Tupas, iya ginpahayag nga ang House Bill 7884 kag House Bill 8295 nga iya ginduso ang lunsay may tinutuyo nga mapauswag ang infrastructure kag tourism programs sa lugar agud makadugang sang investment.
Apisar sini nga mga development, nagpasalig ang natungdan nga mangin prayoridad sa gihapon ang pagtatap sang natural kag cultural heritage para man sa mga pumuluyo sa amo nga mga banwa.
Nagabululigay man ang local government units kag barangay officials suno sa natungdan agud mapauswag pa ang duha ka isla.
Nagalaum si Tupas nga mapadasig na ang pag-apruba sang counterpart bills sini sa Senado.
