Hagna nga nagaduso sa pagtukod sang Dept. of Overseas Filipinos, gin-certify ni Pres. Duterte bilang urgent

Ginsertipikahan ni Presidente Rodrigo Duterte bilang urgent measure ang hagna nga nagaduso sa pagtukod sang Department of Overseas Filipinos.

Sa sulat ni Presidente Duterte nga ginpadala kay Senate President Vicente Sotto III, iya ginpahayag nga urgent measure ang Senate Bill No. 1949 bangud luyag niya nga mabuhinan ang kabudlay sang mga Pinoy nga yara sa iban nga mga pungsod.

Suno pa sa presidente, mas maayo man nga may yara sang mekanismo para sa isa ka whole-of-government approach samtang ginaproteheran ang mga kinamatarong sang mga overseas Filipino workers.

Matandaan nga nakalusot naman sa last reading sa Kamara ang bersyon sang nasambit nga hagna.

Una na ginpahayag ni Presidente Duterte sa iya nakaligad nga State of the Nation Address (SONA) nga isa sa iya nga mga priority legislation ang pagtukod sang Department of Overseas Filipinos.