ILOILO CITY – Nagpabutyag sang interes ang Sweden sa pag-expand sang trade sa tunga sang Philippine kag Swedish companies.
Suno kay Swedish Foreign Trade Minister Johan Forssell sa iya 2-day visit sa Pilipinas, nakit-an niya ang potensyal sang halo-halo nga isa ka bantog nga dessert sang Pilipinas nga mangin maayo nga export lakip na ang iban nga Philippine fruits.
Diri na kag natalana ang pagsinapol suno kay Forsell kaupod ang mga opisyales sang Department of Trade and Industry, Department of Energy, Department of National Defense, Department of Finance kag sang Department of Foreign Affairs.
Ginpahayag dugang sang natungdan nga interesado man ang Sweden sa madamo nga sektor kaangay sang power, railways, infrastructure, kag security.
Dako ang pagsalig sang minister nga ang Pilipinas ang isa ka manami nga lugar para sa investments nga may lamharon nga populasyon kag naga-uswag nga ekonomiya.
Nahibaluan nga sang tuig 2022, nagdangat ang Swedish exports sa Pilipinas sang $152 million ukon P8.744 billion, 10.5 percent nga mas mataas kun ipaangid sa tinalikdan nga tuig.
Samtang, nagtimbuok naman ang Philippine exports sa Sweden sang 127 percent nga nagdangat sa $124 million ukon P6.909 billion.
