Ginabasol sa pinakadaku nga convention center sa North America ang indi kinaandan kag dungan nga kamatayon sang malapit 1,000 ka mga pispis sa Chicago, Illinois, USA.
Kilala ang McCormick Place Lakeside Center nga isa ka iconic building sa amo nga estado bangud sa transparent glass nga amo ang nagaserbe nga mga pader sini, apang sa malain nga palad, indi ini makit-an sang mga pispis gani nagkalabunggo, napatay, kag naglalapta sa downtown area.
Suno sa Chicago Bird Collision Monitors nga isa ka volunteer conservation project nga nakatutok sa pag-proteher sa migratory birds, ang natabo sang tinalikdan nga adlaw amo na ang pinakamataas nga numero sang pispis nga napatay sa sulod lamang sang isa ka adlaw bangud sa ila nga pagkabunggo.
Photo: Lauren Nassef/Chicago Field Museum via AP
Ginalantaw man nga mas magasaka pa ang numero bangud na-obserbaran nga may mga pispis nga nagtinguha pa nga makalupad apisar nagkalasamaran sa amo nga insidente.
Photo: Lauren Nassef/Chicago Field Museum, via Associated Press
Natukiban man nga sang amo nga tion, may yara sang event sa convention center gani bukas ang tanan nga suga nga amo ang posible rason kun ngaa nagsala-sala ang mga pispis.
May yara man sang bagyo sa nabagatnan sang Chigaco nga amo ang ginalantaw rason kun ngaa manubo ang ila nga paglupad.
Sandig sa pagbanta sang mga eksperto, isa ka bilyon nga mga pispis ang nagakapatay kada tuig bangud sa pagka-bunggo sa buildings nga ginahimo sang mga tawo, ilabi na ang mga building nga napalibutan sang glass.
