Ginkumpirma ni Senate President Pro Tempore Ping Lacson nga magapadayon sa Nobyembre 14 ang hearing kaangot sa flood control corruption.
Matabo ini kun mabalik siya sa pwesto sa bilang Blue Ribbon Committee Chairman sa Nobyembre 10.
Pahayag sini, agud mapadasig ang pagpasaka sang kaso batok sa mga pulitiko, opisyal sang Department of Public Works and Highways, kag mga kurap nga kontraktor, maga-imbitar siya sang importante nga mga testigo.
Partikular sini nga ginmensyonar si TSgt Orly Guteza agud nga mas masanagan ang panel sa iya nga ginsumpaan nga naratibo sang nag-atubang siya anay sa Blue Ribbon.
Si Guteza amo ang former security aide ni Ako Bicol Party-list Rep. Zaldy Co. Ang nagdala sa iya sa Senate Blue Ribbon Committee amo si Senator Rodante Marcoleta. Siya man ang nag-implicate kay former House Speaker Martin Romualdez sa flood control controversy. Pahayag sang former marine, nagdul-ong siya anay sang minaleta nga may unod nga “basura” ukon kuwarta para kay Co kag Romualdez.
ANG PAGBALIK NI LACSON
Base sa kumpirmasyon ni Senate President Vicente “Tito” Sotto III, iga-reinstate si Lacson bilang Senate Blue Ribbon Chairman sa pagbukas sang ikaduha nga regular session sang Senado sa Nobyembre.
Suno kay Sotto, malawig ang istorya kun ngaa magabalik si Lacson. Sa ila pag-inistoryahanay suno sa iya, napalab-ot kay Lacson ang “clamor” sang iya mga kaupdanan kag sang publiko nga balikan sini ang committee nga amo ang nagapanguna sa imbestigasyon sa mga iregularidad sa flood control projects.
Matandaan nga nagpanaog si Lacson bilang chairman sang amo nga gamhanan nga committee sang Oktubre 6.
Sang amo nga tion, ginplastar sini sa iya rason nga may pila sa iya kaupdanan nga senador ang diskumpyado sa direksyon sang legislative inquiry sa substandard kag ghost flood control projects.
Kasunod sang iya resignation, nagpungko ang vice chairman sang committee nga si Senator Erwin Tulfo bilang acting chairperson sang panel.
Sang Lunes, una na nakapaguwa sang iya statement si Lacson nga nagasiling nga pananglitan magbalik siya bilang Blue Ribbon committee chairman, dapat nga handa si Sotto nga mag-atubang sa mga kunsekwensya.
Lakip diri ang posible pagkadula sang pila ka myembro sang majority bloc; kag kun matabo ini, posible nga makakas man si Sotto bilang Senate President.
“I have actually discussed this scenario with Senate President Sotto when he broached the idea of giving back the blue ribbon chairmanship to me — that if I am elected again to head the committee, we should be ready for any and all consequences of my actions and decisions including losing some members of the majority bloc and consequently, his senate presidency,” kabahin sang statement ni Lacson.
