Nag-distansya si President Ferdinand Marcos Jr. sa palamangkutanon kun posible bala anay nga i-take over sang gobyerno ang pagdumala sang industriya sang gatong sa tunga sang ginabatyag subong nga krisis sa suplay kag presyo sini sa global market.
Ginpahayag sang Presidente nga indi sini gusto nga istoryahan ang nasambit nga butang.
Nahibaluan nga una na nga gin-ako sang Presidente nga wala sang kontrol ang gobyerno sa presyo sang mga produktong petrolyo, ilabi na nga nga nagabag-o bag-o ang presyo sini sa world market.
Ginpahayag man sini nga mangin ang mga nagaproduce sang gatong indi sigurado kun tubtob san-o magpadayon ang suplay, ilabi na nga apektado ang mga ini sang giyera nga nagakatabo sa Middle East kun sa diin nahamtang ang Strait of Hormuz, nga amo ang alagyan sang mga ginadala nga langis pakadto sa nagkalain-lain nga parte sang kalibutan.
Suno sa Presidente, mabudlay magplano kun nagapadayon ang pagbag-o bag-o nga presyo sang gatong.
Amo man sini ang rason kun ngaa nagapangita sila sang maayo nga lebel sang suporta, kaangay sang pagsuspinde sang pila ka charges sa mga produkto nga pagkaon kag iban pa nga mga inisyatibo agud indi mabatyagan sang pumuluyo ang mabug-at nga epekto sang nagakatabo subong sa Middle East.
