Ang graduation amo ang isa sa pinakamalipayon nga adlaw sa kabuhi sang estudyante.
Apang tuhay nga adlaw ini para sa isa ka high school valedictorian sa Farmers Branch, Texas bangud sa amo man nga petsa, ginlubong ang iya amay.
Apisar mahangpan man kuntani sang tanan kun indi na siya magtambong sa seremonya kag indi na maghatag sang speech, ginpadayon sini ang pag-deliver sang iya nga address nga amo ang rason kun ngaa emosyonal ang halos tanan.
Ini amo ang 18-anyos nga si Alem Hadzic naga-eskwela sa Dallas College Brookhaven Campus sa Texas.
Sang Mayo 15, napatay ang iya amay nga si Miralem bangud sa binulan nga pagpakigbato sa balatian nga pancreatic cancer.
Sang aga, nagbulig pa ini sa paghakwat sa lungon sang iya amay, ginlubong ini sa iya katapusan nga palahuwayan, kag sunod siya nga nagsuksok sang toga kag nagkadto sa iya graduation.
“My father died yesterday, May 15, 2024, and I attended his funeral today, right before graduation,” kabahin sang emosyonal nga speech. “That’s why my shoes are muddy and my arms are shaking. I had to carry him to his grave and bury him.”
Gin-ako sini nga nagablangko na ang iya pinsar kag nagakurog ang tiil samtang naga-speech apang ginpadayon niya ang iya inughambal sang nakit-an sini nga nagahibi man ang audience.
Ginsugid sini sa iya speech nga Enero pa sang na-diagnose nga may cancer ang iya amay kag wala sila sang may ginsugidan.
Apisar nabudlayan siya mag-selebrar, ginpili sini nga magbalik sa eskwelahan bangud nakahibalo siya nga ginpangabudlayan ini sang iya amay. Ini man ang rason suno sa iya nga magapadayon siya sa kolehiyo, manikasog, kag padayunon ang handom sang iya amay para sa iya.
“I can’t stand up here and pretend I want to be doing this speech right now,” pagpadayon pa sini. “But I can’t throw something away that he worked so hard for me to achieve. I am going to spend every hour of every day working as hard as I can to achieve all my goals because that’s what he wanted and I’m going to do it for him,” dugang pa niya.
Pagkatapos sang speech, ginhatagan siya sang standing ovation sang mga estudyante, ila pamilya, mga manunudlo kag administrators.
Matapos nakuha ang iya high school diploma kag ang associate of science degree halin sa Early College High School, plano sang valedictorian nga magsulod sa University of Texas sa Austin kag magsulod sa program nga chemical engineering.
