Ginbasura sang Malacañang ang pila ka mga panawagan sang mga senador nga i-abolish na ang Inter-Agency Task Force for the Management of Emerging Infectious Diseases (IATF) bangud sang ginapahayag indi maayo nga pagpatuman sang mga tikang kag solusyon batok sa nagatimbuok nga kaso sang COVID-19 sa pungsod.
Suno kay presidential spokesperson Atty. Harry Roque, indi sala sang IATF kun naga-mutate ang virus.
Kun i-abolish ang IATF, daw kaangay suno kay Roque nga gina-abolish man ang gobyerno.
Una diri, pila ka mga senador ang nagpahayag nga kinahanglan nga hatagan sang bag-o nga mga lider ang IATF ukon indi gani i-abolish na lang sa tunga sang makalaarma nga COVID-19 surge sa Pilipinas.
Lakip sini nga mga senador amo ang ally ni Presidente Rodrigo Duterte nga si Senator Imee Marcos, si Senate President Vicente Sotto III, kag si Senator Risa Hontiveros.
Sa bahin sang Malacañang, nagpahayag si Roque nga ginabase man sang IATF ang kada desisyon sa data kag science, kag sa pagkamatuod, ang IATF suno sa iya ang ginapadalagan gamit ang whole-of-government approach lakip na ang lain-lain nga ahensya kag pati na ang local authorities.
Suno pa kay Roque, ‘pagpanghangkat’ lang para sa Pilipinas ang bag-o nga mga variants sang coronavirus kag malampasan man ini gihapon.
Ginpahayag pa niya nga pamulitika lang ang rason kun ngaa nagapakamalaot ang iban sa IATF.
Indi man manegar suno sa iya nga samtang nagahilapit na ang 2022 elections, nagahimo himo na sang isyu ang mga tawo.
