ILOILO CITY- Aprubado na sang House Committee on Energy ang amendments sa Downstream Oil Industry Deregulation Act of 1998 sa tunga sang padayon nga pagtimbuok sang presyo sang gatong.
Sa interview sang Bombo Radyo kay Bayan Muna Rep. Carlos Zarate, iya ginpahayag nga sa amo nga ginaduso nga hagna, i- require ang mga oil companies nga mag- maintain sang Minimum Inventory Requirement sa per company, per depot, kag per product basis.
Suno kay Zarate, sa idalom sang proposal, gina-require man ang tanan nga refiners, importers kag distributors nga mag-maintain sang 30 ka adlaw nga balor sang supplies kag kinahanglan nga magpasa man ang mga oil companies sang retail prices sa Department of Energy nga may yara sang masunod nga mga detalye:
1.landed cost of crude oil sa tion nga ini ang ginbakal
2.additional costs nga nagalakip sang port charges, refining costs, storage costs, marketing costs kag iban pa
Ginaduso man ni Zarate ang dalayon na nga pagkakas sang excise tax sa fuel.
Suno pa sa opisyal, sa sulod sang masobra duha ka dekada, nakit-an niya kun ano ang malain nga epekto sang nasambit nga layi sa ekonomiya kag pumuluyo kag paagi sa ginaduso nga hagna, mahatagan gahum ang gobyerno nga mabusisi ang mga libro sang oil companies kag malantaw kun sila ang nagapamentaha sa fuel crisis agud makaginansya.
Ini nga proposed amendments sa oil deregulation law ang kinahanglan pa nga mag-agi sa pila ka proseso antes madala sa plenaryo kag mapirmahan agud mangin laye.
Apang sa subong, ginahulat pa sang mga mamalidha kun magapatawag sang special session si Presidente Rodrigo Duterte.
Nahibaluan nga yara subong sa three-month election campaign break ang kongreso.
