Husto nga impormasyon kag pagpamangkot sa mga ekperto ang sekreto agud madula ang kahadlok sa COVID-19 vaccines.
Ini ang luyag gid ipakigbahin sang mga Pinoy nga yara subong sa luwas sang pungsod nga amo ang nauna nga nakapabakuna batok sa COVID-19.
Kabahin ini ang ikaapat nga hugnat sang The Bombo COVID-19 vaccine Literacy Program.
Suno kay Bombo International Correspondent Miluna Pablo, isa ka healthcare worker sa isa ka government hospital sa Malta sa Europa, nagpangduha-duha man siya sang una sa pagbaton sa Pfizer vaccine bangud sa ginakahangaw-an nga side effects.
Apang bangud prayoridad ang health sector, nagkonsulta si Pablo sa mga tawo nga mas nakahibalo sa bakuna.
Panugyan niya, indi gid magpadala-dala sa fake news kag huring-huring nga ginapasa-pasa man sang mga tawo kag ginakuha sa indi reliable nga mga sources.
Suno kay Bombo International Correspondent Ludovico Baqueriza III, isa ka registered nurse sa New York, may yara man sang orientation nga gina-provide antes ang vaccination.
Nagmato-mato man research si Baqueriza bangud suno sa iya, kanugon nga yara ang available nga resources apang indi maggamit kun magpadala-dala lang sa kakulba ang mga tawo.
Suno naman kay Bombo International Correspondent Patricia dela Torre, nagatrabaho sa non-profit organization para sa imol nga mga kabataan kag naga-specialize sa Early Childhood Education kag director pa gid sang health comprehensive services sa Washington DC sa Estados Unidos, ang labing-una niya nga ginpanumdom amo nga proteheran ang iya kaugalingon.
Kun maproteksyunan niya ang iya kaugalingon paagi sa pagpabakuna, maproteksyunan man niya ang mga tawo sa iya nga palibot.
Sa bahin naman sang mga ginapahayag nga side effects, ginpahayag ni Bombo International Correspondent Baqueriza nga natural lang ang paghanog sa injection site ukon bahin sang lawas kun diin gintublok ang bakuna.
Suno kay Bacqueriza, kun ma-take na ang una nga dose sang bakuna, indi man kinahanglan nga mag-isolate kag pwede gid nga makabalik sa normal nga trabaho.
