May mga tawo gihapon sa Estados Unidos nga nahadlok kag indi pa handa sa pagpabakuna batok sa COVID-19.
Ini apisar natalana na nga ipanagtag ang una nga hugnat sang Pfizer ukon BioNTech vaccine kasunod sang authorization for emergency use nga ginhatag sang US Food and Drug Administration.
Suno kay Bombo International Correspondent Dee Donasco Thompson direkta sa Tennessee, USA, duda ang iban nga mga tawo sa safety nga dala sang nasambit nga bakuna bangud sa rapid development kag approval process.
May iban man nga mga tawo nga nagabatyag na nga daan sang separado nga health issues kag subong nagapahayag nga mahulat sila anay antes makit-an ang long-term effects sang bakuna.
Ini nga mga duda ang gindugangan pa sang reports nga may yara sang severe adverse reactions nga natabo sa duha ka healthcare workers sa United Kingdom matapos nabakunahan sang Pfizer vaccine.
Ang nasambit nga mga healthcare workers ang may yara na nga daan sang history sang serious allergies.
Suno pa kay Thompson, ginakwestyon man sang iban nga mga tawo kun ngaa kinahanglan pa magsuksok sang face mask kun matuod nga 95% protection ang gina-offer sang Pfizer vaccine batok sa COVID-19.
Suno naman kay Dr. Ryan Thompson, bana ni Bombo International Correspondent Dee Donasco Thompson nga nagatrabaho kaupod ang physician group sa Murfreesboro, Rutherford County, Tennessee, madamo ang misconception sang mga tawo sa bisan anuman nga bakuna.
“Cautiously optimistic” ang mga tawo suno kay Dr. Thompson amo nga subong masami pa sila nga nagapamangkot tuhoy sa safety kag protection sang Pfizer vaccine.
Suno sa data nga gin-release sang U.S. Food and Drug Administration, nagataas ang level sang protection kun maavail na ang ikaduha nga dose kag nagahatag sang mas malawig nga immunity ipaanggid sa isa lang ka shot.
Matandaan nga una na nagboto ang advisory group sa U.S. Centers for Disease Control and Prevention nga irekomenda ang Pfizer vaccine sa mga residente nga nagaedad 16 anyos pataas.
