Ginbasura sang International Criminal Court (ICC) Pre-Trial Chamber I ang ginhingyo sang kampo ni former President Rodrigo Roa Duterte nga mapahanugutan sila nga mag-apelar sa desisyon nga nagkumpirma sang mga kaso batok sa iya.
Sa 12 ka pahina nga desisyon nga ginpagwa subong nga adlaw, Mayo 21, ginpahayag sang chamber nga ang duha ka isyu nga ginpresentar sang depensa indi matawag nga “appealable issue” ukon isyu nga sarang pa nga maapelar sa atubang sang ICC Appeals Chamber.
Una nga gin-insister sang depensa paagi anay kay Nicholas Kaufman nga tuman ka sangkad ang paglaragway sang mga kaso, apang suno sa Chamber, klaro ang sakop sang mga kumpirmado nga kaso, lakip na ang panahon, lugar, mga ginapahayag nga suspek, kag mga kategorya sang mga biktima.
Gin-reject man sang ICC ang argumento sang depensa nga kulang ang ebidensiya sa desisyon sa pagkumpirma sang kaso.
Suno sa Chamber, indi kinahanglan nga detalyado nga patpaton ang kada ebidensiya sa confirmation stage bangud indi pa ini ang aktwal nga trial.
“The Defence’s submissions regarding the Second Proposed Issue mischaracterise the Confirmation Decision and amount to a mere disagreement with the manner in which the Chamber articulated its assessment of the evidence,” suno pa sa Chamber.
Ini nga desisyon ang pirmado nanday Presiding Judge Iulia Antoanella Motoc, Judge Reine Adélaïde Sophie Alapini-Gansou, kag Judge María del Socorro Flores Liera. Sila ang nanguna sa confirmation hearing sa kaso ni Duterte sadtong Pebrero 2026.
Nauna na nga nagdesisyon ang amo man nga chamber sang Abril nga ipasaka sa full-blown trial ang kaso matapos na-establisar nga may substantial grounds agud patihan nga responsable si Duterte sa crimes against humanity nga murder kag attempted murder.
Sa pagsulundan sang ICC, kun may desisyon na sa confirmation hearing, indi awtomatiko nga maka-apelar ang Defense ukon ang Prosecution apang mahimo sila maka-request sang authorization halin sa Pre-Trial Chamber agud nga mahimo ini.
Patigayunon sang Trial Chamber III ang status conference sa kaso ni Duterte sa Mayo 27.
