Ginmanduan ni Iloilo City Police Office (ICPO) Director Police Captain Wilbert Parilla ang hepe sang Police Station 3 nga solbaron sa labing-madali nga tion ang asud-asud nga mga kaso sang pagpangawat sang motorsiklo sa area nga sakop sang ila hurisdiksyon.
Ini ang kasunod sang natabo sang motornapping incident malapit sa Land Transportation Office (LTO) sa Quintin Salas, Jaro, Iloilo City sang Pebrero 3, kag ginsundan sang isa pa ka pagpangbiktima sa amo gihapon nga barangay sang Pebrero 11.
Sa interview sang Bombo Radyo kay Parilla, iya ginpahayag nga ginpabulig man sini ang City Intelligence Unit, kag naghatag man sang direktiba nga dapat may koordinasyon sa iban pa nga police stations sa syudad agud maaresto gilayon ang suspek.
Suno kay Parilla, nagmandu siya nga usisaon kun isa lang bala ka tawo ang suspek sa duha ka magkatuhay nga mga insidente.
Ini bangud magluwas nga isa lang ka barangay natabo ang duha ka kaso, nakit-an nga may pagkapareho sa panglawason sang suspek sandig sa closed-circuit television footages.
“Good thing is that nakakuha tayo ng footage na hindi siya nag-helmet, so there is a big possibility na ma-identify natin,” suno kay Parilla.
Magluwas sa sini nga duha ka kaso, sandig sa record nga napalab-ot sa Bombo Radyo, may duha ka iban pa nga motornapping incidents nga natabo sa Jaro kag isa sa Molo. Sa tanan nga nasambit nga insidente, wala sang may nadakpan nga suspek.#
