ILOILO CITY – Ginmanduan sang Police Regional Office 6 (PRO-6) ang Iloilo City Police Office (ICPO) nga imbestigaran sang maid-id ang natabo nga buybust operation sa Brgy. Sta Filomena, Arevalo kasunod sang isa ka ginapahayag abduction sa Rizal St., Iloilo City sang Martes, Marso 3.
Sa exclusive interview sang Bombo Radyo kay PBGen. Rene Pamuspusan, director sang PRO-6, iya ginpahayag nga ginahulat na lang sa subong ang report nga iga-sumite ni ICPO Director Pol. Col. Eric Dampal.
Suno kay Pamuspusan, umpisahan ang pagpatigayon sang imbestigasyon paagi sa video nga nakuha sang natabo ang insidente.
Nahibaluan nga sa nasambit nga video, makit-an nga ang tagreklamo nga si Alyas Tam kuntani ang gintuyo kuhaon sang mga lalaki, apang bangud tuman ang pagpanghawid sini sa poste agud indi mapilit nga madala sa salakyan, ginpwersa naman nga dal-on sang amo nga mga lalaki si Anthony William Landicho, 36, sang Poblacion, Nueva Valencia, Guimaras.
Pagkatapos sang ginapahayag abduction, takna ‘las otso sa gab-i, gin-conduct sang Regional Drug Enforcement Unit (RDEU) ang buybust operation sa Brgy. Sta Filomena, Arevalo, Iloilo City, sa diin ginpahayag nga P3,000 ang nakuha nga buybust money gikan kay Landicho.
Suno kay Pamuspusan, indi pa subong masigurado kun mga katapo gid sang RDEU ang nakit-an sa video.
Dugang pa sang natungdan, kinahanglan anay nga lantawon kag imbestigaran ang tanan nga anggulo.
Sa bahin naman sang seguridad sang tagreklamo nga si Alyas Tam, nagpasalig ni Pamuspusan nga ginmanduan na niya ang ICPO nga siguraduhon nga wala sang malain nga matabo sa kondisyon nga magpalapit lang si Alyas Tam kay Dampal agud mapadasig ang imbestigasyon.
