ILOILO CITY- Nagpatigayon sang rekorida ang nanuhay- tuhay nga ahensya sang gobyerno may kaangtanan sa kampanya agud maproteksyunan ang mga pamatan-on kag mapaluntad ang kalinong kag katawhay sa syudad.
Ini may kaangtanan sa serye sang nagakatabo nga rambol nga involved ang mga pamatan-on kun sa diin sang damlag lang, isa ka menor de edad ang patay sa inaway sang kabataan sa Barangay Rizal Pala-Pala I, Iloilo City Proper.
Sa interview sang Bombo Radyo kay Teresa Gelogo, pinuno sang Iloilo City Social Welfare and Development Office nga nag-upod man sa rekorida, iya ginpahayag nga katuyuan nila nga mapalapnag sa publiko ang mga ordinansa sa syudad kag engganyuhon ang mga ginikanan nga mangin responsable sa ila kabataan.
Apang suno kay Gelogo, indi lang kabataan nga ginakabig Children in Conflict with the Law ang ila target kundi mangin mga Ati kag Badjao nga nagatuga man kun kaisa sang kahadlok sa publiko bangud sa ila batasan.
Ginpatigayon ang programa sa Iloilo City Police Office antes naglibot sa syudad sang Iloilo.
Nag-upod sa rekoridad ang pila ka talatapan kaangay sang Public Safety and Transportation Management Office, mga barangay officials kag mga barangay tanod.
Nagpangabay sang kooperasyon ang pamunuan sang Iloilo City Police Office sa tanan nga partners sini nga ahensya sang gobyerno sa kampanya agud mapalayo sa katalagman ang mga pamatan-on.
Kadungan ini sang ginpatigayon nga rekorida kagab-i agud ipalapnag sa mga pumuluyo ang ila responsibilidad agud indi maanad ang mga pamatan-on nga magtuga sang kinagamo kag maproteksyunan man ang mga ini gikan sa halit nga tuga sang pag-upod sa mga gangs.
Sa interview sang Bombo Radyo kay PCol Joeresty Coronica, director sang Iloilo City Police Office, iya ginpahayag nga indi lang ang law enforcement agencies ang dapat nagahulag kundi ang tanan nga myembro sang sosyodad.
Suno kay Coronica, nagasugod dapat sa puluy-an ang disiplina kag ginapadayon sa eskwelahan.
Ginakilala man ni Coronica ang bulig sang simbahan, ano man nga relihiyon sa pagtinguha nga matudluan ang kabataan kun paano mangin maayo nga myembro sang komunidad.
