Nadumduman mo bala ang Navy veteran sa Estados Unidos sang Amerika nga amo ang nangin ikaduha nga tawo sa bug-os nga kalibutan nga madinalag-on nga nasayluhan sang korason sang baboy?
Ginkumpirma mismo sang University of Maryland Medical Center nga nagtaliwan siya sang Oktubre 30 — anum ka semana pagkatapos sang maragtason nga operasyon.
Ang pasyente amo si Lawrence Faucette, 58-anyos nga residente sang Frederick, Maryland nga nakabaton sang amo nga organ sang baboy sang Septyembre 20.
“We mourn the loss of Mr. Faucette, a remarkable patient, scientist, Navy veteran, and family man who just wanted a little more time to spend with his loving wife, sons, and family,” suno kay Dr. Bartley P. Griffith nga amo ang nag-perform sang transplant.
Photo: University of Maryland-School of Medicine
Nahibaluan nga antes pa man ang operasyon, indi na pwede si Faucette sa human heart transplant bangud sa iya malala nga medical conditions lakip na ang peripheral vascular disease. Sang nasaylo naman sa iya ang korason sang baboy, naggana ini sa nauna nga mga inadlaw, apang sang ulihi nagpakita na sang senyales sang rejection.
Madumduman nga una na nga ginpahayag sang Navy veteran nga ginkapyutan niya ang gamay kaayo nga tyansa sa xenotransplant kag wala gid siya nagsala sa desisyon bangud kasunod sang madinalag-on nga procedure, maka-ginhawa na siya sang maayo, matalunsay na ang pitik sang iya korason, kag naga-gana ini nga wala nagakinahanglan sang supportive device.
Ang operasyon kay Faucette ang ginpangunahan sang mga eksperto kag mga doktor halin sa University of Maryland School of Medicine– ang team nga nagpatigayon man sang labing-una nga transplant sang korason sang baboy sa tawo sang nagligad nga tuig.
Sang amo nga tion, duha ka bulan pa nga nagkabuhi ang 57-anyos nga pasyente nga si David Bennett matapos ang transplant apang napatay man bangud maluya na nga daan ini antes pa man ang operasyon.
Ang xenotransplant sa USA amo ang ginalantaw nga makahatag sang solusyon sa chronic shortage sang human organ donations. Nahibaluan nga sa subong, masobra 100,000 ka Americans ang nagahulat para sa organ transplants. #
