Pasakaan sang kaso ni Iloilo City Councilor Joshua Alim ang mga myembro sang Sangguniang Panlungsod nga nagboycott sa session sang Iloilo City Council sa diin mayor nga agenda amo ang pagdeklarar sang state of calamity sa syudad.
Sa exclusive interview sang Bombo radyo kay Alim, iya ginpahayag nga kaso administratibo kag may penalidad nga perpetual disqualification ang iya ipasaka nga kaso batok kanday Vice Mayor Jeffrey Ganzon, Councilors Love Baronda, Ely Estante, Leila Luntao, Armand Parcon kag Jay Trenas nga lunsay kaalyado ni Iloilo City Lone District Congressman Jerry Treñas.
Suno kay Alim,wala sang valid reason ang pag-absent sang mga myembro sang Sangguniang Panlungsod sang nagligad nga Martes sa diin makabig ini nga iligal.
Partikular nga gintumod ni Alim amo si Konsehal Baronda nga nagakadapat kuntani indi mag-absent sa sesyon bangud siya ang nagaserbi nga committee chairman sang Social Services and Disaster Relief sa konseho.
Nahibaluan nga lakip lang sa mga nagtambong sa sesyon amo sanday City Councilors Liezl Joy Zulueta-Salazar, Candice Tupas, Eduardo Peñaredondo, Plaridel Nava, Joshua Alim, R Leone Gerochi, kag Lyndon Acap.
Naka-leave naman sang Martes si Councilor Mandrie Malabor, nga kaalyado naman ni Iloilo City Mayor Jose Espinosa III.
