ILOILO CITY – Nagdepensa si Iloilo City Councilor Plaridel Nava II matapos ginpasakaan sang graft case sang Office of the Ombudsman sa Sandiganbayan.
Sa interview sang Bombo Radyo kay Nava, iya ginpahayag nga nakibot siya nga malakip siya sa kaso sa diin dapat kuntani nga siya ang mangin witness batok kay former Iloilo City Mayor Jed Patrick Mabilog.
Sa iya official statement, ginpatpat man ni Nava ang iya kaugalingon nga version sa kaso.
Paathag ni Nava, sang tuig 2014, sa idalom sang pagdumala ni Mabilog, nagbakal ang Iloilo City Government sang wheel clamps para sa pagpatuman sang ‘clamping and towing ordinance’ sa diin siya ang nagserbe nga author sini.
Sang 2015, nagsulod si Mabilog sa isa ka private-public partnership contract kag joint venture sa private towing and clamping company.
Bilang resulta sang kontrata, ginpasakaan ni anay Provincial Admistrator Manuel “Boy” Mejorada si Mabilog sang kaso kriminal kag adminstratibo sa Office of the Ombudsman.
Nag-execute naman si Nava sang affidavit bilang suporta sa kaso ni Mejorada nga nagakumpirma sa alegasyon ni Mejorada batok kay Mabilog.
Nag-file man si Mabilog sang counter-charge batok kay Nava sa Office of the Ombudsman sa diin gin-claim sini nga ang konsehal amo ang tag-iya sang 3L Clamping and Towing Services.
Nagdesisyon naman ang Ombudsman nga pasakaan sang kaso sanday Nava kag Mabilog sa Sandiganbayan.
Ginkumpirma man ni Nava nga naka-file na siya sang motion agud i-dismiss ang kaso.
Apang tubtub subong, wala ini naresolbar sang korte.
Positibo naman si Nava nga mabasura ang kaso.
Magluwas pa suno sa natungdan nga kulang ang ebidensya, indi na subong mahibaluan kun sa diin si Mabilog.
