ILOILO CITY- Hugot nga gina-monitor sang Iloilo City Government ang distribution sang tubig sa mga barangay nga recipient sang potable water nga gina-deliver sang Metro Pacific Iloilo Water kag South Balibago Water Works.
Sa interview sang Bombo Radyo kay Engr. Neil Ravena, pinuno sang General Services Office, iya ginpahayag nga kinahanglan nga mahatag gid sa mga pumuluyo ang husto nga volume sang tubig.
Nahibaluan nga base sa kontrata, kinahanglan nga magdeliver sang Metro Pacific Iloilo Water kag South Balibago Water Works sang 696 cubic meters per day nga tubig sa mga benepisyaryo nga kabarangayan.
Suno kay Ravena, may yara man sila sang mga inspectors agud mapat-ud nga tayuyon kag bastante ang water distribution.
Pahayag ni Ravena, mangayo man sila sang catch-up plan sa Metro Pacific Iloilo Water kag South Balibago Water Works sa tion nga indi sila makadul-ong sang required nga volume sang tubig.
Nahibaluan nga humalin sang nagdeklarar sang state of calamity ang syudad bangud sa water shortage, nagtinguha ang Bombo Radyo Foundation Inc. kag ang Flowater Resources Iloilo, Incorporated nga maghatag sang potable water para sa mga pumuluyo sang syudad.
As of May 10, yara na sa 362,400 liters sang tubig ang na-deliver sang Bombo Radyo Foundation Incorporated kag Flowater Resources Iloilo, Incorporated sa 43 ka mga barangay.
