ILOILO CITY – Magahatag sang bulig ang Iloilo City Government sa mga nabiktima sang Bagyo Ursula sa iban nga lugar sa Western Visayas.
Sa interview sang Bombo Radyo kay Mayor Jerry Treñas, iya ginpahayag nga nagakadapat lang nga buligan ang mga naapektuhan sang bagyo bangud nga ang mga taga syudad sang Iloilo sadto ang ginbuligan man sang mga taga iban nga lugar sang may natabo nga kalamidad.
Suno kay Treñas, makabig nga pamaskwa ang igahatag nga bulig sang Iloilo City Government, sa manpower man ukon nanari-sari nga resources.
May kaangtanan diri, nagpromisa ang alkalde nga magahatag sang financial assistance ang Iloilo City Government.
Ginpahayag sang natungdan nga sa pagpadayon sang sesyon sang Iloilo City Council sa 2020, iya iplastar kun pila ang igahatag nga kantidad kag kun ano nga Local Government Unit sa probinsya sang Iloilo ang mangin benepisyaryo.
