Nakabalik na sa Barangay Tacas, Jaro, Iloilo City ang empleyado sang Iloilo City Hall nga ginapahayag nagpadulong pa sa Calinog, Iloilo apisar nga nakahibalo ini nga positibo siya sa COVID-19.
Sa interview sang Bombo Radyo kay Punong Barangay Joseph Poral, iya ginpahayag nga ginabantayan na sang mga kapulisan kag barangay tanod ang balay sang empleyado sa diin siya na-quarantine.
Suno kay Poral, Mayo 29 sang hapon sang naghalin sa barangay ang empleyado kag pagkagab-i, nagtawag sa iya ang contact tracing team sang syudad kag ginpahibalo nga nagpositibo ini sa COVID-19.
Gin-abisohan man sang contact tracing team ang empleyado pahayag sang punong barangay nga indi anay magguwa kag magpabilin lang sa sulod balay bangud pagka Mayo 30, kuhaon ini agud ibutang sa quarantine facility.
Apang sang liwat nga nagtawag ang contact tracing team sa empleyado sang Mayo 30 sang aga, ginkakibot sang team ang sabat sang COVID-19 positive nga yara siya sa Calinog, Iloilo.
Suno kay Poral, Mayo 31 sang nakit-an ang empleyado nga nag-abot sa Barangay Tacas kag sang ginpamangkot kun ano bala ang iya ginsakyan, nagsabat lang ini nga wala siya nakahibalo kun motorsiklo ukon triycle.
Apang sang gincheck ang closed circuit television (CCTV) footage sang barangay, indi motorsiko kag indi man tricycle ang ginsakyan sang COVID-19 positive sa pagbalik sa Tacas kundi nagsakay ini sa Taxi.
