ILOILO CITY- Nagapangaman na ang Iloilo City Government sa posible pagtaas sang kaso sang COVID-19 pagkatapos sang eleksyon sa Mayo 9.
Ini kasunod man sang pagpabilin sang syudad sa Alert Level 1 umpisa Mayo 1 tubtob 15 santo sa anunsiyo sang Inter-Agency Task Force for the Management of Emerging Infectious Diseases.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga bangud mas mahalog ang mga restriction sa aktibidad sang mga pumuluyo, mas maayo nga ma-regulate sa gihapon ang mga tawo ilabi na sa adlaw sang eleksyon.
Suno kay Conlu, may yara sang compliance team nga magabantay sa kada polling precinct agud magpatuman sang physical distancing sa mga botante.
Sa bahin naman sang Iloilo Provincial Government matapos ginpaidalom na ang bilog nga probinsya sa alert level 1, ginpahayag ni Provincial Administrator Atty. Dennis Ventilacion nga nagastock-up na ini sang mga bulong sa mga ospital agud nga sa tion nga magtimbuok ang kaso sang COVID-19, handa ang probinsya.
