ILOILO CITY – Magapabilin sa Modified General Community Quarantine ukon MGCQ ang syudad sang Iloilo sa bilog nga bulan sang Abril.
Sa interview sang Bombo Radyo kay Jeck Conlu, COVID-19 spokesperson sang syudad, iya ginpahayag nga apisar indi pa fully-controlled ang COVID-19 cases sa syudad, napunggan man ang dugang nga local transmission.
Suno kay Conlu, nagnubo na kag nagbalik na naandan nga 11 tubtob 12 ang marekord nga kaso sang COVID-19 sa syudad kada adlaw.
Sa subong, naga-random test ang COVID-19 team sa mga lugar kun sa diin ginadudahan nga may bag-o nga transmission ukon may bag-o nga kaso sang coronavirus.
Naga-random test man sa mga lugar kun sa diin masami nagtinir ang mga empleyado sang Hinduja Global Solutions, Business Process Outsourcing (BPO) company nga nahamtang sa SM Strata sa Senator Benigno Aquino Jr. Avenue, Mandurriao, Iloilo City.
Madumduman nga nagsaka sa masobra 100 ang COVID-19 cases sa amo nga BPO company sang damlag lang gani ginsigurado gid sang COVID-19 team nga wala na ini nagsaylo pa sa mga barangay.
Maayo suno kay Conlu bangud na-isolate gilayon kag naswab test ang mga direct close contacts. Sa subong kontrolado na ang kaso sang COVID-19 sa Hinduja Global Solutions.
