Natalana nga maghatag sang iya State of the City Address (SOCA) si Iloilo City Mayor Raisa Treñas sa bwas nga adlaw, Oktubre 8.
Ini kadungan sa iya ika-100 nga adlaw nga pagpungko bilang alkalde sang syudad sang Iloilo.
Sa interview sang Bombo Radyo, ginpahayag ni Mayor Treñas nga isa sa mga pinaka-highlight sang iya speech amo ang 40 ka mga programa nga iya natukod umpisa sang siya ang nangin alkalde.
Isa sa ginahatagan niya sang dako nga balor amo ang Atipan Center nga opisyal nga ginbuksan sang Agosto 19, 2025.
Ang Atipan Center amo ang nagaalagad sa mga vulnerable sectors, ilabi na ang mga kabataan, katigulangan, kag mga may kinahanglan nga espesyal nga bulig.
Lakip man sa SOCA ang mga short-term kag long-term goals sang iya administrasyon para sa padayon nga pag-uswag sang syudad.
Ginalauman naman ang presensya sang mga opisyal gikan sa nagkalain-lain nga government offices sa nasambit nga kahiwatan.
