Nabatak sa Red Warning ang pila ka mga banwa sa probinsya sang Iloilo bangud sang epekto sang Habagat nga mas ginpabaskog sang Bagyo Inday.
Base sa alas singko sa kaagahon nga weather advisory sang Philippine Atmospheric, Geophysical and Astronomical Services Administration (PAGASA) subong nga adlaw, Hulyo 11, napasaka sa amo nga warning ang Barotac Nuevo, Dumangas, Iloilo City, Leganes, Mina, New Lucena, Oton, Pavia, Pototan, San Miguel, Santa Barbara, Tigbauan kag sa Zarraga.
Sa idalom sini nga status, ginpaandaman ang mga pumuluyo sa nasambit nga mga lugar sang posible matabo nga seryoso nga pagbaha.
Sa pihak nga bahin, ginpasaka naman sa Orange Warning ang Capiz, Aklan, Negros Occidental, Guimaras, Antique kag ang pila pa ka mga banwa sa Iloilo nga amo ang Ajuy, Alimodian, Anilao, Badiangan, Balasan, Banate, Barotac Viejo, Batad, Bingawan, Cabatuan, Calinog, Carles, Concepcion, Dingle, Dueñas, Estancia, Guimbal, Igbaras, Janiuay, Lambunao, Lemery, Leon, Maasin, Miagao, City of Passi, San Dionisio, San Enrique, San Joaquin, San Rafael, Sara, kag Tubungan.
Sa idalom naman sini nga status, posible suno sa weather bureau ang pagbaha sa manubo nga mga lugar kag pagtiphag sang duta sa mataas nga mga lugar.
Padayon nga gina-abisuhan ang Disaster Risk Reduction and Management Offices kag ang publiko nga padayon nga mag-monitor sa weather conditions kag maghulat sa masunod nga warnings halin sa weather bureau.#
