ILOILO CITY – Napun-an ang paglaom ang mensahe ni Iloilo City Vice Mayor Jeffrey Ganzon kadungan sang inagural session sang Iloilo City Council subong nga adlaw.
Suno kay Ganzon, ginakabig sini ang 2019 bilang best year sang Sangguniang Panlunsod.
Ginkilala man ni Ganzon si Iloilo City Mayor Jerry Treñas bilang isa ka man of vision kag ginalauman nga magahatag sang dako nga opurtunidad sa Syudad sang Iloilo.
Magluwas sini, ginkilala man ni Ganzon si Iloilo City Lone District Congresswoman Jamjam Baronda nga anay myembro sang Sangguniang Panlunsod kag subong nagatiglawas na sa Syudad sang Iloilo sa Kamara.
Nagalaom naman si Ganzon nga madula na ang banggi-anay sang mga indi magka partido sa Iloilo City Council.
Samtang, ginpanugyanan man sang bise alkalde ang mga bag-o nga konsehal nga maghimo sang ila katungdanan sang insakto sa bulig sang mga re-elected nga mga opisyal.
Positibo naman si Ganzon nga pinaagi sa pagbuligay sang mga opisyal , makakuha sang madamo nga mga pasidungog ang Syudad sang Iloilo.
