ILOILO CITY- Ginpasigurado sang Ilonggo boxer nga si Denver “The Excitement” Cuello nga mangin madinalag-on ini sa iya liwat nga pagsaka sa boxing ring sa diin maatubang niya ang anay muay thai combatant nga si Detnarong Omkrathok sang Thailand.
Patigayunon ang ila sambuwa sa Barangay Vergara Covered Court, Mandaluyong City sa Agusto 3, alas-8 sang gab-i.
Sa exclusive interview sang Bombo Radyo Iloilo kay Cuello nga tumandok sang Barangay Tuy-an, Cabatuan, Iloilo, iya ginpahayag nga ang nasambit nga away ang magaserbi nga tune-up fight antes niya atubangon ang World Boxing Council super flyweight champion nga si Juan Francisco Estrada sang Mexico.
Suno sa 30-anyos nga si Cuello, natalana na kuntani ang ila away ni Estrada sa Hulyo 24 sa Las Vegas, Nevada apang ginpaiway bangud kinahanglan anay ang isa ka tune-up fight sa junior flyweight division bag-o siya tugutan nga atubangon si Estrada para sa world title fight.
Sa subong, gina-uyatan ni Cuello ang Asia Boxing Federation Junior Flyweight Division championship belt.
Matandaan nga ulihi nga nag-away si Cuello sang Marso 8,2019 matapos ang apat ka tuig nga pagpahuway bangud sa shoulder injury.
