LAMBUNAO, ILOILO – Ang pagpangamuyo sa Ginuo kag ang pagpalangga sa pamilya ang ginkuhaan sang kusog sang isa ka Ilongga Domestic Helper sa Canada agud nga malampuwasan ang naangkon nga brain aneurysm.
Sa panaysayon sa Bombo Radyo ni Riza Anne Bernabisa sang Brgy. Sibacungan, Lambunao, Iloilo, nagserbe siya nga domestic helper sa Singapore sa sulod sang pito ka tuig bag-o nagsaylo sa Canada kaupod sa iya employer.
Ang kapigaduhon ang nagtulod kay Bernabisa nga magtrabaho sa luwas sang pungsod agud nga makabulig sa iya anum ka utod kag sa iya ginikanan.
Sa labing una nga pagtrabaho ni Bernabisa sa luwas sang pungsod, ginbugayan siya sang maayo nga employer apang sa wala ginalauman, nasapwan na lang siya sang iya kaupod nga domestic helper nga wala na sang pangalibutan sa iya ginahigdaan.
Bag-o na-comatose, nadumduman pa sang Ilongga OFW nga nagbugtaw siya gikan sa katulugon, nagpadulong sa Comfort Room kag nagbalik liwat sa pagtulog.
Sang gindala siya sa ospital, didto na nahibalu-an nga nag-angkon siya sang brain aneurysm kag may magamay na lang nga kahigayunan nga mabuhi.
Suno kay Bernabisa, bisan ang doktor ang nagpanugyan nga kun malab-utan pa sang pila ka bulan bag-o siya makabugtaw, kinahanglan na lang nga dal-on pabalik diri sa Pilipinas ang iya lawas.
Samtang na-comatose, ginpahayag ni Bernabisa nga iya nabati-an ang ginahambal sang mga tawo sa iya palibot, bisan ang pagpangadi sang iya employer kag mga abyan sa Singapore.
Bangud nga indi man makahulag ukon makahambal, iya na lang nga ginapaagi sa paghibi ang pagsabat.
Iya man nakita ang isa ka lalaki nga nagasuksuk puti nga panapton kag kasubong nga ginahagad siya apang wala siya nag-upod.
Makaligad ang tatlo ka adlaw, milagro suno sa Ilongga OFW nga nakabugtaw siya kag gilayon nga nakaguwa sa ospital sa diin naglab-ot na sa kapin P5 million anga iya hospital bill.
Daku ang iya pagpasalamat bangud sa bulig sang iya employer, mga abyan kag kakilala nga nagbulig agud nga mabayaran ang iya hospital bill.
Sa nasambit nga pagtilaw, daku ang pagpasalamat sang natungdan sa Ginuo kag sa tanan nga nagbulig agud nga masugpunan ang iya kabuhi.
