Ginamonitor sang maayo sa Estados Unidos ang mga pasyente nga naka-avail na sang bakuna para sa COVID-19.
Isa diri amo ang Ilonggo Nurse nga tumandok sang Ajuy, Iloilo nga subong nagatrabaho na sa New York, USA.
Sa interview sang Bombo Radyo kay Ludovico Baqueriza III, iya ginpahayag nga bangud assigned siya sa duha ka ospital sa New York, duha man ka mga ospital ang nagpili sa iya agud mabakunahan.
Para sa libre nga COVID-19 testing, ginapili suno kay Baqueriza ang mga hospital personnel nga nagatrabaho sa emergency room, Intensive Care Unit, ukon ang mga staff nga may close contact gid sa mga COVID-19 positive nga pasyente.
Bangud isa ang Estados Unidos sa pinakauna nga mga pungsod nga nagpatigayon sang mass vaccination gamit ang Pfizer-BioNTech vaccine, ginpahayag ni Baqueriza nga may yara man siya sang mga pagpangduha-duha sang una apang nadula ini tanan bangud sang iya research kag pagpamangkot man sa iban.
Antes ginabakunahan ang mga tawo, standard procedure suno sa natungdan nga ipahibalo sa ila ang posible nga mga side effects sang bakuna; kag kun mangindi ang pasyente, wala man ginapilit ang pagbakuna.
Matapos ang pagbakuna, kinahanglan suno kay Baqueriza nga magtinir sang 30 minutos sa clinic agud mamonitor ang reaction sang pasyente.
Kasunod sini, mahimo na makabalik sa normal nga aktibidad ang pasyente apang kinahanglan i-monitor sang Department of Health adlaw-adlaw paagi sa pagpa-fill in sa mga forms.
Sa subong suno kay Baqueriza, wala gid sang violent reaction ang iya nga lawas kag natalana pa siya nga magbalik sa Enero 6 sa masunod nga tuig para sa ikaduha nga injection.
Suno sa data nga gin-release sang U.S. Food and Drug Administration, nagataas ang level sang protection kun maavail na ang ikaduha nga dose kag nagahatag sang mas malawig nga immunity ipaanggid sa isa lang ka shot.
Sa mga tawo nga naga-kwestyon sa 95% protection nga gina-offer sang Pfizer vaccine, nagpanugyan si Baqueriza nga padayon gid nga mag-research agud madaug ini nga mga pagpangduha-duha.
