ILOILO CITY- Nagapangabay ang tag-iya sang balay nga amo ang ginatudlo nga ginhalinan sang sunog sa Brgy. Tanza Bonifacio kag naglaton pati sa pila ka pamalay sa Rizal Estanzuela nga kuntani indi magdumot sa ila pamilya ang ila mga kasilingan nga nadulaan sang balay bangud sa sunog.
Sa interview sang Bombo Radyo kay Luisa Vacaro, iloy sang siyam ka tuig nga bata nga si Tata nga amo ang ginapahayag nga nagsindi sang kandila nga ginhalinan sang kalayo, iya ginpahayag nga wala sang sin-o man nga naglaum nga matabo ini sa ila.
Sa pihak sang natabo, nagapasalamat sa gihapon ini nga nakaluwas ang iya anak matapos nga nakagwa ini sa ila balay samtang nagadako ang kalayo.
Samtang, nagapabilin naman sa evacuation center ang mga biktima.
Sa una nga assessment,sa Tanza Bonifacio,24 ang totally burned,12 ang partially burned,kag 57 pamilya ang apektado.
Samtang, sa Rizal Estanzuela, 11 ang totally burned, siyam ang partially burned, kag 25 ang pamilya nga apektado.
Sa interview sang Bombo Radyo kay Sarah Panelo, Social Welfare Officer III sang City Social Welfare and Development Officer- City Proper, iya ginpahayag nga padayon ang paghatag sang bulig sang syudad para sa apektado nga mga pamilya.
