NEW LUCENA, ILOILO – Restricted sa New Lucena Police Station ang isa ka police personnel matapos gina-alegar nagpalupok sang iya nga service firearm sa Barangay Bita-og Gaja, New Lucena, Iloilo.
Ang ginatumod nga pulis amo si Police Staff Sergeant Agar Octaviano, imbestigador sang New Lucena Municipal Police Station.
Sa interview sang Bombo Radyo kay Police Staff Sergeant Rodel Umahag, imbestigador sang New Lucena Municipal Police Station, iya ginpahayag nga padayon man subong ang imbestigasyon sang Internal Affairs Service (IAS).
Santo sa panaysayon ni Octaviano, nagpadulong siya sa iya amay sa Barangay Bita-og Gaja sang Disyembre 10 kag sang manugpauli na siya, ginpahapit siya sa ila duta kun sa diin nagkit-anay sila sang grupo ni Andy Somido.
Ginapahayag nga may daan na nga hiligut-anon sa tunga nanday Octaviano kag Somido bangud man sa away sa duta.
Ginpahayag ni Octaviano nga nagbaisay siya kag ang grupo ni Somido kag sang ulihi, ginsapote siya kag nalipong.
Sang naumpawan si Octaviano, gin-alegar niya nga buot siya nga damhagan sang 6 tubtob 7 ka kaupod ni Somido gani nagpalupok siya sang iya nga pusil bilang warning shot.
Indi lang matumod sang imbestigador kun kapila magpalupok si Octaviano apang may isa ka fired cartridge sang 9mm nga narecover sa area.
Santo naman sa panaysayon sang grupo ni Somido, nag-abot ang pulis sa ila nga compound nga may dala na nga binangon kag nangtaya sang pusil. Handa ang duha ka kampo nga magpasaka sang kaso batok sa isa kag isa.
Mapasaka ang kampo ni Somido sang mga kaso nga Threat, Physical Injury, kag Trespassing batok kay Octaviano; samtang magapasaka naman si Octaviano sang kaso nga Direct Assault batok sa kampo ni Somido.
Ginpasa naman ang recovered fired cartridge sa crime laboratory para sa cross matching kag ballistic examination.
