Nagpahayag sang suporta ang Philippine National Police (PNP) sa gina-duso nga imbestigasyon sa Senado kaangot sa gina-alegar tuyo nga tabunan ang pagdakop kay Police Master Sergeant Rodolfo Mayo, ang pulis nga nakuhaan anay sang P6.7-billion nga balor sang shabu sang Oktubre 2022.
Suno sa statement nga ginpaguwa sang PNP, isa ini ka “welcome development” agud nga malimpyuhan ang isyu nga nagapalibot sa pinakadaku nga drug accomplishment sang amo nga tuig.
Matandaan nga nag-file si Sen. Ramon Revilla Jr. sang Resolution No. 564 nga nagaduso sa nagakaigu nga mga komite sa Senado nga magpatigayon sang inquiry sa ginaalegar involvement sang high-ranking officials sa amo nga insidente.
Antes pa man ang tikang ni Revilla, mismo si Department of the Interior and Local Government (DILG) Secretary Benjamin Abalos Jr. ang nagbuyagyag sang mga pangalan sang mga police officers nga involved man sa amo nga kaso.
Sa bahin sang kapulisan, ginpanindugan sang PNP nga mabakod kag agresibo ang ila kampanya batok sa iligal nga droga sa pungsod.
Suno pa sa police force, ang halimbawa sini amo ang kaso ni Mayo kag sang iya mga kahimbon sa paglapas sa Republic Act 9165 ukon ang Comprehensive Dangerous Drugs Act of 2002 nga pending subong sa korte.
