Indi kuntento si Senator Imee Marcos sa mga impormasyon nga iya natipon sa una nga inquiry sang upper chamber kaangot sa pag-aresto kay former President Rodrigo Roa Duterte.
Suno sa presidential sister, magapawatag siya liwat sang ikaduha nga public hearing sa Huwebes sa masunod nga semana, Abril 3.
Natalana man nga isapubliko sang Senate committee on foreign affairs kun sanday sin-o nga mga personalidad ang magakadto sa ikaduha nga hugnat sang inquiry. Sang nagligad nga semana, lakip sa nagpungko sa Senado amo sanday CIDG chief Major General Nicolas Torre III, General Rommel Marbil sang Philippine National Police (PNP), Sec. Gibo Teodoro sang Department of National Defense (DND), Sec. Boying Remulla sang Justice Department, kag iban pa nga mga miyembro sang Gabinete.
Una na nga ginpahayag ni Imee nga may kumprehensibo nga plano ang gobyerno sa pagdakop kay Duterte kag sa pagkooperar sa International Criminal Court (ICC) apisar sang mga pamangkot sa soberanya kag mga maathag nga paglapas sa kinamatarong sang former president.
Ginsiling man anay ni Imee nga nakit-an sang Senate foreign relations committee investigation nga may kakulangan sa due process sa pag-turn over kay Duterte sa The Hague kasunod sang iya drug war-related crimes against humanity case.
Antes sang naka-schedule nga ikaduha nga public hearing sang iya committee, matandaan nga nagbiya na si Imee sa senatorial lineup nga Alyansa para sa Bagong Pilipinas nga gina-endorso sang iya utod nga si President Ferdinand Marcos, Jr.#
