Ginpangabay sang House Prosecutors sa senator-judges sa impeachment trial batok kay Vice President Sara Duterte nga indi pag-i-base sa pulitika ukon popularidad ang pag-hukom kun i-convict ang bise presidente.
Sa opening statement ni House Lead Prosecutor kag Batangas Representative Gerville Luistro, ginpanawagan sini sa mga senador nga maglantaw sa mga ebidensya, magpamati sa mga testigo, mag-usisa sa mga record, kag magsunod sa mga ebidensya sa kun diin man ang direksyon sini.
“Look at the evidence. Listen to the witnesses. Examine the records,” suno sa prosecutor. “Judge this case not by politics, not by popularity, not by fear, not by loyalty.”
Ginpahayag man sini nga magapresentar ang prosekusyon sang kaso nga nakaangkla sa official records, financial documents, government reports, video recordings, sworn statements, kag independent findings.
“Evidence, hindi chismis, hindi haka-haka, hindi propaganda at lalong hindi socmed narrative,” pahayag sini sa iya paglaragway sa ila ginpreparar nga presentasyon sa impeachment court.
Suno pa kay Luistro, sa masunod nga mga tinuig, malimtan na ang alyansa sa pulitika apang pat-od nga madumduman sang publiko kun nagtindog bala ang mga institusyon sa Pilipinas sa tion nga may ginasukot nga accountability.
Ginpahanumdom man sini nga daku ang kaangtanan sang impeachment sa pagpangabuhi sang ordinaryo nga mga Pilipino.
“Ang usapin ngayon ay patungkol sa isang bagay na pag-aari nilang lahat. Ang kanilang pera, ang kanilang tiwala, ang kanilang karapatan na maningil ng pananagutan mula sa mga pinuno na kanilang pinagkatiwalaan,” pahayag pa sini.
“If a barangay treasurer must account for public funds, then so must the vice president,” dugang sa iya opening speech.
Nahibaluan nga ang mga akusasyon kay Duterte sa impeachment amo ang sala nga paggamit sang confidential funds, pamahog sa presidente, indi mapaathag nga manggad, kag pagpanuhol sa mga opisyal sang gobyerno.
