Naghimo sang maragtas ang India bilang labing-una nga pungsod sa kalibutan nga madinalag-on nga nakapadala kag nakapahugpa sang spacecraft sa south pole region sang bulan.
Sa amo nga kadalag-an, nakaupod man ang India sa listahan sang dalagku nga mga pungsod nga may soft landing sa bulan nga nahimo lamang sang Estados Unidos sang Amerika, anay Soviet Union, kag China.
Wala sang tawo ang Chandrayaan-3 ukon ang “Mooncraft” sang ginpatigayon ang amo nga mission.
Naka-agaw sang atensyon ini nga misyon halin sang ginlunsar halos anum ka semana na ang nagligad sa atubang sang linibo ka mga tawo nga nagahilinugyaw. Mangin ang mga pulitiko sa India ang nagpanguna pa sa Hindu prayer rituals agud mangin madinalag-on ang mission.
Sang nakakas na ang lander nga Vikram sa propulsion module kag nakahugpa na sa amo nga region, lauman nga maga-explore ini sa surface kag magapadala sang data sa kalibutan sa sulod sang duha ka semana sini nga lifespan.
Ang kadalag-an sang India ang kasunod sang natabo sa Russia sang nagligad nga semana sang wala na-kontrol ang ila ginpadala nga Luna-25 nga spacecraft sa bulan kag nagtibusok.
Madamo nga mga pungsod kag kumpaniya ang nagapa-indis-indis nga makauna sa pagkadto sa south pole region sang bulan bangud sang craters nga posible may yara sang frozen water nga makabulig sa masunod pa nga mga misyon sang mga astronaut.
Sa amo man nga dumaan nga tubig posible makakuha sang rekord sang lunar volcanoes, materyal nga gina-dul-ong sang comets kag asteroids sa Earth, kag ang ginhalinan sang dagat. Kun madamo man nga ice ang makit-an sa amo nga region, mahimo man ini mainom kun may yara sang moon exploration kag makabulig man nga mapalamig ang mga equipment. Mahimo man mabuka ang ice kag maka-produce sang hydrogen para sa fuel kag oxygen agud makaginhawa kag maka-suporta sa misyon sa Mars ukon sa lunar mining.#
