ILOILO – Magapatigayon sang month-long celebration ang Indigenous People kun sa diin ginadumdom ang tradisyon kag kultura sang mga IP.
Sa interview sang Bombo Radyo kay Delia Pauden, Cluster Chairman sang Indigenous People sa Hamtic, Antique, iya ginpahayag nga dako nga kahigayunan sa ila ang patigayunon nga Indigenous People’s month agud ipakita ang ila nga kultura kag tradisyon.
Suno kay Pauden, indi sa gihapon malikawan ang diskrimanasyon sa ila nga grupo apisar madamo na sa ila ang nagmadinalag-on sa kabuhi.
Ginpahayag ni Pauden nga paagi sa Indigenous People’s month, nagalaum sila nga mabag-o ang panulok sa ila sang sosyodad kag mas mahatagan sila sang igtalupangod.
Kabahin sang Indigenous People’s month amo ang pagpatigayon sang programa kaangay sang poster making contest sa mga estudyante, livelihood programs, forums kag madamo pa.
Nagpanawagan man si Pauden sa gobyerno nga mahatagan sang igtalupangod ang Indigenous People bangud nga nagatinguha man sila nga mangin maayo ang ila kabuhi.
Nagahingyo man ang natungdan nga hatagan sang dugang nga scholarship programs ang ila mga kabataan agud makatapos sa pagtuon.
Ginpahanumduman man ni Pauden ang iya mga ka-tribu nga mangin mabaskog sa pihak sang pagpakamalaot sa ila kag padayon lang nga maghimakas agud mangin maayo ang ila pagpangabuhi.
