ILOILO CITY – Nagapamigado, tigulang na, kag ginahatagan na lang sang pagkaon ang 53-anyos nga South Korean nga lalaki sa Barangay West Timawa, Molo, Iloilo City nga sang ulihi natukiban nga big-time scammer gali nga nagpalagyo lang halin sa South Korea.
Kahapon sang hapon, Abril 5, nagserbe ang Criminal Investigation and Detection Group (CIDG) – Iloilo Field Unit sang warrant of arrest batok sa amo nga South Korean national nga si Park Kyounghyoun, tatlo ka tuig na nga nagatinir sa boardinghouse sa amo nga barangay.
Sa interview sang Bombo Radyo kay CIDG – Iloilo field unit commander Police Major Jess Baylon, iya ginpahayag nga most wanted fugitive sang International Criminal Police Organization (INTERPOL) si Park sa South Korea.
Pebrero 18, 2019, nagdagdag ang Seoul Central District Court sang arrest warrant batok kay Park sa krimen nga fraud. 32 ka mga complainants ang nakuhaan ni Park sang kwarta nga nagdangat sa P416 million.
Suno kay Baylon, santo sa impormasyon nga ginpalab-ot sang INTERPO-Seoul paagi sa INTERPOL-Manila, 2012 pa lang, may yara na sang nagareklamo kay Park bangud sa iya pagpanunto.
Nagapakuno-kuno siya nga isa ka gold miner nga nagalibot sa lain-lain nga mga pungsod samtang naga-invest naman ang mga South Koreans sang dalagku nga balor sang kwarta kabaylo sang bulawan.
Ginapahayag nga antes nagpadulong sa Iloilo, madamo pa nga lugar ang ginhapitan ni Park kaangay sang Manila, Cebu, kag China. Santo sa iya panaysayon sa pulis, may karelasyon siya sang una nga Ilongga apang sang ulihi, nagbulagay man sila.
Nagaisahanon sa iya boardinghouse si Park kag ginapahayag nga namigado man bangud gambler man ini sa sulod sang malawig nga tinuig.
Ginaproseso na sang CIDG nga iturn-over ang arestado nga si Park sa Korean National Police Agency ukon Korean National Police para sa nagakaigu nga disposisyon.
