Indi na makahulat ang mga Pinoy sa Rome, Italy sa pagpadulong St. Peter’s Square agud makatambong sa maragtason nga pagpanguna ni Pope Francis sang misa para sa ika-500 nga anibersaryo sang Kristiyanismo sa Pilipinas.
Sa bahin ni Bombo International Correspondent Gabina Sumagpao direkta sa Rome, Italy, naghagaday sila sang iya anum ka mga abyan agud nga masaksihan ang misa sa Basilica kag mapakigbahin man ini sa mga tumuluo nga yari lang sa pungsod Pilipinas.
Wala naman sang dugang nga mga dokumento nga ginarequire antes makasulod ang mga Pinoy nga tumuluo sa St. Peter’s Square agud makalantaw paagi sa widescreens nga ibutang sa piazza sa gwa sang basilica.
Nagapasalamat man si Sumagpao nga mahimo sila makagwa sa ila nga ginatrabahuan sa ila nga dayoff kag indi tuman ka hugot ang coronavirus restrictions.
Ang lockdown naman ang ginapaabot nga ipatuman isa ka adlaw matapos ang historic mass sa St. Peter’s Basilica.
Katunga sang 20 ka mga rehiyon sa Italya, lakip na ang Rome, Milan, kag Venice ang mapaidalom sa bag-o nga lockdown agud matapna ang ikatatlo nga wave sang COVID-19 infections.
Sa Red Zones, indi na makabiya sa ila tagsa ka balay ang mga tawo magluwas lang sa work and/or health reasons.
Sa Orange Zones, ginadumilian ang mga tawo nga magbiya sa ila town kag rehiyon magluwas lang sa work and/or health reasons samtang ang bars and restaurants ang limitado lang sa delivery kag take-away service.
