Nasapwan nga patay ang isa ka bag-ong ginbun-ag nga lapsag nga lalaki sa likod sang isa ka balay sa Imperial Homes 3, Borres Compound, Brgy. Onate De Leon, Mandurriao, Iloilo City.
Sa interview sang Bombo Radyo kay Melecia Del Rosario, 61-anyos, residente sang nasambit nga lugar kag ang nakasapo mismo sa lapsag, iya gin pahayag nga sang pasado ala-11 sang aga kahapon, Agosto 3, samtang nagapanilhig siya sang mga basura sa likod sang ila balay iya nakita ang isa ka plastic kag iya ini ginkimpit kag ginbukad.
Iya nadiskubrehan nga may sulod ini ang bag-o nga bun-ag nga lalaki nga lapsag.
Suno kay Del Rosario nga ang bata nasulod sa eco bag, tapos nakaputos pa gid ini sa duha ka lain pa nga plastic.
Dugang pa niya, nagapanimaho na ang bata sang iya gin buksan ang plastic kag posible nga tatlo tubtob apat na ka adlaw nga ginbilin sa lugar antes ini nasapwan.
Mala na ang dugo sa lawas sang bata kag utod na ang iya umbilical cord.
Ginpahayag man ni Del Rosario nga ang compound gamay lang kag halos kilala sang mga residente ang isa kag isa.
Sa likod sang balay sang nakasapo sang lapsag, may ara sang activity center sang isa ka pribado nga kompanya.
Ang compound kag ang activity center may nagaseparar nga pader nga ginabulubanta may 20 metros ang kataason kun sa diin isa nga possible nga ginalantaw nga gin haboy halin didto ang lapsag ukon gintaban sang ido kag gin dala sa lugar kung sa diin ini nasapwan.
Ginkuha na sang CSWDO ang lawas sang lapsag agud pagadal-on sa simbahan para pagabindisyunan kag ipalubong.
Sa karon, padayon pa ang imbestigasyon sang Mandurriao PNP agud makilala kun sin-o ang may kahimuan sa pagbilin sang lapsag.
