Nakakita ka na bala sang manugpakilimos lang pero may yara sang kaugalingon nga sports utility vehicle (SUV)?
Daw makibot ka man kag mapa-“sana all” kun may makilala ka nga amo sini!
Amo gid ina ang nabatyagan sang isa ka social welfare department officer sa Maran District sa Pahang, Malaysia sang damlag lang sang may nadiskubrehan sila nga manugpakilimos nga manggaranon.
Sang amo nga tion, nag-conduct ang team sang operasyon sa mga nagapangayo-kayo sa Sri Jaya night market sa Maran.
Ginpalapitan sang staff ang 45-anyos nga tawo bangud madamo ang nagareklamo sa iya pagpangalimos.
Sa una nga lantaw, makaluluoy gid ang lalaki bangud malip-ot ang duha ka kamot sini kag may bitbit pa nga paper bag kun sa diin ginabutang ang limos.
Suno pa sa taga-social welfare, ginpinsar nila nga apa kag bungol ang lalaki bangud wala ini nagasabat kun pamangkuton. Apang wala nag-untat ang team sa pagpangusisa kag sang ulihi, ginpangitaan ini sang identification card (ID).
Nakibot ang welfare officers sang naghambal ang lalaki kag nagsiling nga nabilin ang iya ID sa kotse.
Nakibot pa sila sang nakit-an ang premium SUV, isa ka Proton X70 nga ginabanta nagabalor sang P1.4-million tubtub P1.5 million.
Ginsugid man sang lalaki nga nagalab-ot sa P5,800 kada adlaw ang iya matipon sa kada adlaw nga pagpanglimos.
Bangud isa man ini ka person with disability, nagabaton man ini sang monthly allowance nga sobra sa P5,000 halin sa social welfare department halin sang 2001.
Amo ini suno sa iya ang ginagamit para sa car installment kag adlaw-adlaw nga kinahanglan.
Wala man sang ginkaso ang social welfare officers bangud una pa lamang ini nga offense. Ginsilingan man ini nga untaton ang pagpakilimos kag iga-review man ang iya nga status para sa makuha sini nga government allowance.#
