Natural lang para sa iloy nga ulikdan kag paminsaron pirme ang buasdamlag sang iya anak — pati na ang pagpangasawa sini ukon kun kay sin-o ayhan ini nga babaye magatupa.
Kun naga-nobyahanay na gani sila, ginausisa gid sang iloy kun maayo man ayhan ang batasan sang babaye kag kun maayo ang impluwensya nga dala sini.
Apang may indi basta-basta nga mga kaso sang isa ka iloy kun sa diin sa sobra sini nga panumdom sa asawahon sang iya anak, nasarangan sini nga mang-agaw sang bata sang iban!
Ini amo ang Chinese nga babaye nga si Yang nga may yara sang 27-anyos nga anak nga lalaki.
Isa ka adlaw sang Pebrero 2023, nagbisita siya sa Liupanshui City sa probinsya sang Guizhou kun sa diin nakit-an sini ang 11 -anyos nga bata nga babaye. Kumbinsido si Yang nga mangin maayo nga asawa ang bata sa iya anak nga lalaki KUN mapadako lang ini sang maayo.
Gani wala na ini sang huya-huya pa kag nag-ayo sa mga ginikanan sang bata kun pwede niya ini ma-adopt. Wala nagpasugot ang Tatay, gani nga nagpauli na lang si Yang, apang wala pa didto natapos ang iya nga plano.
Nagbalik si Yang sa amo nga syudad kaupod na mismo ang iya 27-anyos nga anak nga lalaki kag sang nahibaluan nila nga wala sang kaupod ang bata sa balay, ila ini ginkuha kag gindala sa ila nga balay.
Anum ka adlaw ang nagligad, gin-aresto si Yang kag apat ka adlaw ang makaligad sina, nagsungka man ang iya anak nga lalaki.
Ginsentensyahan ang duha sang pagka-preso kun sa diin duha ka tuig para kay Yang kag pito ka bulan naman para sa anak sini bangud sa child abduction.
Gin-apelar pa nila ang desisyon apang sang nagligad lamang nga bulan, ginpalig-on pa sang Appeals Court ang nauna nga desisyon sang korte kag ginpatuman gid ang sentensya.
Tuman naman ang kaugot sang iban bangud nga kalip-ot lang sang tion nga mapreso ang duha apisar nga daku nga krimen ang ila nahimo nga isa ka child trafficking.
Nahibaluan nga may daan nga tradisyon sa China nga ginatawag nga child brides ukon ang “tong yang xi” kun sa diin naga-adopt ang pamilya sang bata nga babaye agud nga padak-on ini kag hanason para mangin maayo nga asawa sa ila bata nga lalaki. Gin-ban na ini sang 1950 apang ini nga practice ang ginapadayon gihapon sa rural areas kaangay sa natabo natabo sa sini nga kaso.
