Patay ang isa ka pasyente sa Estados Unidos matapos makabaton sang organ transplant halin sa isa ka indibidwal nga may rabies.
Suno sa Toledo-Lucas County Health Department sa Ohio, ang pasyente ang taga-Michigan apang ginabulong sa Lucas County, Ohio sang Disyembre 2024.
Ang kidney nga gin-transplant sa iya halin sa donor nga indi residente sang Michigan ukon Ohio, suno sa Michigan Department of Health and Human Services (DHHS).
Sa isa ka pahayag, ginklaro sang University of Toledo Medical Center nga sa ila ospital sa Ohio nahimo ang kidney transplant kag nagtaliwan ang pasyente sang Enero, matapos ang transplant nga ginpatigayon sa katapusan nga bulan sang tuig 2024.
Ginpat-ud sang Michigan DHHS, Ohio Department of Health kag Centers for Disease Control and Prevention (CDC) nga wala sang risgo sa publiko sa duha ka estado sa Estados Unidos.
Suno kay DHHS spokesperson Lynn Sutfin, na-assess na sang mga health officials ang tanan nga nag-upod kag nag-atipan sa pasyente agud masiguro nga wala sang posible nga exposure sa rabies.
Wala na naghatag sang dugang detalye ang mga otoridad nahanungod sa donor kag sa pasyente para sa ila privacy.
