Mapahuway lang sang gamay ang Pilipinas kun makaguwa na si Bagyo Tino bangud magabulos naman ang isa ka tropical depression nga pangalanan nga Uwan.
Sandig sa latest weather bulletin sang Philippine Atmospheric, Geophysical and Astronomical Services Administration (PAGASA), ginsiling nga nakit-an ang bagyo sa kalayuon nga 1,830 km nasidlangan sang Southern Mindanao.
May dala ini nga kabaskugon sang hangin nga 55 km/h kag pagmadlos nga tubtub sa 70 km/h. Nagahulag ini pa-nakatundan nabagatnan nakatundan sa kadasigon nga 20 km/h.
Gina-forecast nga magasulod ini sa Philippine Area of Responsibility (PAR) bilang isa ka Typhoon sa Byernes sang gab-i ukon sa Sabado sang aga.
Sa sulod sang PAR, mahimo ini magbaskog kag mahimo nga super typhoon.
Mas nagasaka man ang tyansa nga maka-landfall si Uwan apang indi pa matumod subong sang weather bureau kun diin gid ang eksakto nga lokasyon. Magahatag sila sang update paagi sa masunod nga advisories.
Kun makasulod na sa PAR, ini ang pang-21 nga bagyo sa Pilipinas subong nga tuig kag pangaduha naman sa Nobyembre.
Una na nga ginpahayag sang weather bureau nga duha tubtub tatlo ka tropical cyclones ang magasulod ukon magaporma sa PAR sa Nobyembre.
