Nagtaas ang tyansa nga mangin isa ka Tropical Depression sa masunod nga 24 oras ang isa ka Low Pressure Area (LPA) nga yara sa guwa sang Philippine Area of Responsibility (PAR).
Sa latest nga report sang Philippine Atmospheric, Geophysical, and Astronomical Services Administration (PAGASA), na-monitor ang LPA sa kalayuon nga 2,175 km nasidlangan sang northeastern Mindanao.
Sa pihak nga bahin, padayon naman nga gina-monitor ang Typhoon Tino sa sulod sang PAR. Ulihi nga nakit-an ang sentro sini sa coastal waters sang Guiuan, Eastern Samar dala ang kabaskugon sang hangin nga 150 km/h kag pagmadlos nga tubtub sa 205 km/h.
Nagahulag ini sa direksyon nga pa-nakatundan sa kadasigon nga 30 km/h.
Gina-forecast sang weather bureau nga magalabay ukon maga-landfall si Bagyo Tino sa Homonhon Island ukon sa Dinagat Islands subong nga gab-i. Buwas sa kaagahon, posible nga mag-landfall na naman ini sa Leyte ukon sa Southern Leyte antes magtabok sa Visayas kag sa northern Palawan halin buwas tubtub sa Myerkules sang kaagahon.
Sa Myerkules sang aga ukon sa hapon, magatuhaw ang bagyo sa West Philippine Sea kag ginalauman nga magaguwa sa PAR sa Huwebes sang aga.#
