Nangin palaagyan ang mga pagsinapol kaupod ang Department of Public Works and Highways–Iloilo City District Engineering Office (DPWH–ICDEO) agud masanagan ang mga barangay official kag mga pumuluyo kaangot sa isyu sang pagbaha sa syudad.
Ini ang pahayag ni Iloilo City Lone District Representative Julienne “Jamjam” Baronda kasunod sang serye sang ‘People’s Meeting’ nga ginpatigayon sang iya opisina kaupod ang ICDEO.
Suno kay Baronda, paagi sini, nahangpan sang mga Ilonggo nga indi dapat pag-ibasol ang tanan sa DPWH.
“Because ang may mandate to mitigate [sang baha] kag magpa-pondo especially kung barangay roads are the barangay and the City of Iloilo or the LGU,” suno sa kongresista.
Ginpahayag ini ni Baronda kadungan sang ikaapat kag final leg sang People’s Meeting sang Oktubre 29 kun sa diin naka-sentro ang istorya sa pagbaha sa Lapuz kag La Paz.
Antes sina, may yara man sang kaangay nga meeting sa Jaro, Molo, City Proper, Mandurriao, kag Arevalo.
“It’s very fruitful kay naintindihan nila. Parehas sina — indi man na pwede nga mabasol lang ta tanan sa national government kay ang ila nga mandate, klaro. National road. National highways,” pahayag pa sini.
Gin-abi-abi man sini sanday City Council Majority Floor Leader Rex Marcus Sarabia kag Councilor Nene De Llana nga nagtambong sa final session kag naghaboy man sang mga pamangkot.
Ginpahanumdom pa ni Baronda ang importansya sang pag-isa agud masolbar ang dinekada na nga problema sa baha sa syudad.
“Kinahanglan mag-double time gid kita. It’s over 26 years, or 30 years, ang baha ara gihapon. Umpisahan ta, kag tapuson ta para sa masunod nga generation,” pahayag pa sini.
Nahibaluan nga gin-umpisahan ang People’s Meetings sang Oktubre 23.
Gin-updan ini sang mga tiglawas nagikan sa national government agencies kaangay sang Department of Human Settlements and Urban Development (DHSUD), Department of Education (DepEd), National Irrigation Administration (NIA), Department of Environment and Natural Resources (DENR), Department of the Interior and Local Government (DILG), city offices, kag iban pa.
