Kun magkinot ikaw sa pagkaon kag maggasto ka lang sang tubtob sa 70 pesos kada adlaw, ano ayhan ang sarang kadtuan sang imo gintipon nga kwarta?
Masarangan mo ayhan magbakal sang balay?
May yara sang isa ka babaye nga 70 pesos lang ang iya gasto sa pagkaon adlaw-adlaw kag nakabakal sang balay.
Ini amo si Saki Tamogami, isa ka 37-anyos nga real-estate agent, kag kilala siya sa Japan bilang pinakamakinot nga babaye bangud sa iya commitment sa paggasto sang tuman ka gamay sa pagkaon kag mangin sa iya kinahanglanon.
Sang 19-anyos siya nag-umpisa sa pagkinot sang kwarta.
Sa edad nga 27, nakasupot ini sang kwarta halin sa iya sweldo kag nagbakal sang balay sa Saitama, north sang Tokyo, sa balor nga 10 million yen ($69,000).
Makaligad ang pila ka tuig, nagbakal ini sang iya second house sa balor nga 18 million yen ($124,000), kag makaligad pa gid ang lima ka tuig, nabakal niya ang ikatatlo nga balay sa balor nga 37 million yen ($256,000).
Sa pihak nga nalab-ot niya ang iya handom, padayon ini nga nagakabuhi nga makinot kag nagasupot sang kwarta agud nga magbulig sa mga gin-rescue nga kuring.
Nakabukas na ini gani sang cat cafe sa ground floor sang isa sa iya nga mga balay kag plano nga mag- invest sa iban nga properties sa palaabuton.
